Nakumpiskar sang mga katapo sang City Drug Enforcement Unit (CDEU) gikan sa duha ka mga lalaki samtang nagasakay sa pribado nga salakyan nga ginrentahan lang ang nagabalor ₱1.7 million nga ginaalegar shabu nga nagabug-at sang ginabulubanta 250 gramos sa dalan Yap, Barangay Singcang Airport, ciudad sang Bacolod subong nga gab-i, Setyembre 22, 2025.
Ang subject sa drug buy-bust operation ang ginakabig nga High Value Individual (HVI) nga ginkilala kay alyas “Roy”, 25-anyos, nga residente sang Purok Abada Escay, Zone 5, Barangay Vista Alegre sa nasambit nga ciudad kag kaupod man sini ang menor de edad nga si alyas “Jay-ar” nga 15-anyos.
Suno kay Police Lieutenant Richard Legada, Assistant Chief sang CDEU, ang subject sa buy-bust ang anay na nga napreso sang tinalikdan nga Setyembre 25, 2022 sa pagbayolar sang RA 9165 ukon Comprehensive Dangerous Drugs Act of 2002 kag na-release sang April 2023 kag on provision pa subong.
Ginpahayag ni Legada nga ang menor de edad nga imbolbado ang iga-turnover sa Women and Children Protection Desk (WCPD) sang Police Station 8.
Samtang, narekober sang CDEU ang isa ka sachet sang shabu kag ₱1,000 nga mga buy-bust items.
Narekober man ang 15 ka sachet kag duha ka knot-tied nga shabu nga yara sa possession sang subject.
Magluwas sa droga, narekober man sang CDEU ang isa ka kutsilyo kag .357 nga armas-luthang lakip na ang duha ka bala.