Wala sang ghost project kag naga-exist ang apat ka mga flood control projects nga una ginbisita kag ginpadulungan sang mga katapo sang Council of Concerned Citizens (C3) Bacolod sa ila nahauna nga adlaw sang inspection kahapon, Setyembre 22, 2025.
Ini ang ginalakipan sang Lupit River; Loygoy River; Ngalan River kag Bakyas Creek nga base sa report sang 3C ang tatlo diri ang may P96.5 million nga balor sang flood control projects samtang ang isa naman ang P91.6 million.
Sa interview sa C3 ginkumpirmar ni Atty. Ceasar Beloria nga wala sang ghost project sa apat nga ila ginpadulungan apang ginpahayag man sini nga ila iga-tsyekyar sang ilabi na sang ila engineer sa 3C ang kalidad, takos, stability sang estrukrura, completion date, kag iban pa may angut sang mga ginpatuman nga proyekto.
Apisar, wala sang ‘ghost’ project kag naga-exist ang mga proyekti, ginpabutyag ni Beloria nga wala pa natapos ang ila imbestigasyon may kaangtanan diri.
Sa pihak nga bahin, ginpahayag naman ni former Councilor Atty. Renecito Novero nga isa sa tamdon sang kag subject sang report 3C ang sa bahin sang costing.
Pahayag ni Novero, may mga costing nga yara sa P96.5 million ang Approved Budget for the Contract (ABC) pero ang na-approved ang yara sa masobra P95 million kag may variance nga P1 million apang naubos sa gihapon ang ABC nga ‘suspicious’ suno kay Novero.
Nagpalab-ot man sang pagpasalamat ang 3C sa mga project engineers sang Bacolod nga nangin bukas, naghatag sang pila ka mga dokumento nga ginpangayo sang grupo kag nag-upod sa ginpatigayon nga inspection.