Ginabuligan sang Sagay City Government ang ila mga komunidad agud labi pa nga mapasanyog ang ila palangabuhian upod sa patag sang turismo.
Ginpahayag ni Sagay City Tourism Officer Helen Arguelles nga kumpiyansa sila sa ikasarang sang ila mga komunidad kag paagi sa suporta agud sila makaangkon sang nagakaigo nga ihibalo updan pa sang pag-respeto kag paghatag sang dignidad, sarang nila mapaumwad ang ila palangabuhian.
Nahibaluan nga ang tagsa ka tourist destination sa Sagay City ang ginadumala sa bulig sang mga pumuluyo sang lugar kaangay sang Suyac Island, Pala-pala sa Vito, Lapus Lapus Floating Cottage kag Kape Albarako nga may partisipasyon sang mga asosasyon sang mga residente.
“We want to change the narrative of kapigaduhon to powerful stories of change, transformation. Amo na from traysikad driver to store owners, that spark conservation and savings. From mangingisda to now restaurant owners”, suno pa kay Arguelles.
Samtang, ginpahayag naman ni Councilor Benson Fernandez, ang chairman sang Committee on Tourism sa Sangguniang Panlungsod, nga magluwas sa mga kilala na karon nga mga tourist destinations kasubong sang Suyac Island kag Pala-pala sa Vito, sunod nila nga iga-develop ang Molocaboc Island.
Ginpasiguro man sini nga magluwas nga gina-promote nila ang turismo sang ila nga ciudad, ila ginasiguro nga indi maguba ang ecosystem rason nga ginalimitahan ang kadamuon sang mga bisita sa pila ka mga tourist spots.
Bilang anay City Sports Coordinator, plano man ni Councilor Fernandez nga ma-incorporate ang mga patag sang turismo kag hinampang.