Deretso sang bisan sin-o ang mag-inspection sa mga proyekto sang gobyerno. Ini ang paghayag ni Mayor Greg Gasataya angut sa pagsugod na sang Concerned Citizens Council (C3) sang inspection sa mga flood control projects sa Bacolod kaina sang aga.
Sa press conference sang alkalde, ginkumpirmar sini nga ang simbahan ang nagpadala sa iya sang komunikasyon angut sa patigayunon nga inspection gani nga si City Engineer Loben Ceballos, ang ginpaupod sini.
Suno sa alkalde, gina-respeto sini ang komunikasyon sang simbahan. Para sa alkalde, basta ang motibasyon sa ginahimo sang C3 amo ang transparency kag validation sa mga proyekto sang gobyerno, bukas siya diri.
Apang kon lain naman, mahibaluan man ini sang pumuluyo. Gina-respeto sang alkalde ang mga miembro sang simbahan nga nagapanguna sa inspection. Ginhatagan man pagtamod ni Mayor Gasataya ang iban nga miembro sang C3 nga nangin kasumpong sini sa politika sa nagligad.
Nahibaluan nga miembro sang C3 ang mga kaparian halin sa Diocese of Bacolod, mga engineers, abogado, civil society kag progressive groups.
Miembro man sang C3 ang kilala nga abogado nga si Atty. Cesar Beloria kag former Councilor, Atty. Renecito Novero nga nagpadalagan bise alkalde upod kay former Vice Mayor El Cid Familiaran nga nangin kasumpong ni Gasataya sang midterm elections sang Mayo. |