PROVINCIAL CAPITOL – Liwat nga nagtapan ang porsyon sang Ibid Creek sa Sitio Tamburong, Barangay Biaknabato, La Castellana nga una na nga ginkuhaan sang nagsupot nga balas gikan sa Bulkan Kanlaon matapos ang pagtupa sang ulan humalin kahapon.
Ginpahayag ni Barangay Kagawad Allan Tomaquin nga amo sa karon ang acting Punong Baragay sang Biaknabato, ang mga balas nga una na nga ginpahigad sa ginpatigayon nga clearing operation ang gin-anod pabalik sa sapa.
Ginpahayag naman ni La Castellana MDRRMO Head John De Asis, bangud sang sagunson nga ulan kag baha sang tinalikdan nga weekend, nagtapan ang mga kalog-kalog ukon riverways nga ginhimo sa ginpatigayon nga clearing operation sa naibabaw nga porsyon sang sapa sang nagligad nga semana.
Paathag ni De Asis, nagluntad ini sa lugar nga kun sa diin may yara sang avulsion ukon ang pagkatiphag sang duta sa kilid sang sapa bangud sang dalayon nga pagdaludo sang tubig rason nga naglapad ini gikan sa 8 meters, karon ini ang nangin 53 meters na kaangay sang isa ka football field.
Bangud sini, nagpangalihid ang tubig sa norte nga bahin sang taytay sa Sitio Tamburong rason nga nagbaha sa pila ka mga panimalay.
May 17 ka mga pamilya nga gin-evacuate kahapon apang nakapauli na ang mga ini matapos nga nagtahaw ang baha.
Sa karon, nagpadala na sang dugang nga heavy equipment ang Provincial Government para sa nagapadayon nga clearing operation kun sa diin yara na sa pito ka mga equipment ang nagakalkal sang sapa samtang 13 naman ang mga dump trucks nga nagahakot sini padulong sa MKNP compound.
[Screengrab of Allan Tomaquin’ post/FB]