Madamo na sang nagakalain-lain nga sahi sang tattoo may traditional kag may ara man realism. Madamo sang nagakahilig diri sa diin bisan diin nalang nga parte sang ila lawas, luyag nila ma cover sang ini nga art.
Apang magluwas sa panit ano pa gid bala ang pwede tattoo-an?
Suno sa report sang Chinese media outlet nga Guangming, ang tooth tattoos nagasugod na subong nga mangin isa ka bag-o nga uso sa kabataan sa China.
Kun lantawon, daw indi gid maayo nga ideya ang mag-ukit sang mga simbolo kag picture sa imo ngipon ilabi na kun imo ginahalunga ang imo oral health.
Pero sa matuod, ang tooth tattoos ang wala ginadirekta tatoo sa ngipon kundi sa ibabaw sang crown nga ginhimo gamit ang 3D printing technology kag ginabutang lang sa ibabaw sang matuod nga ngipon.
Isa sa mga rason kun ngaa madamo sang nagakahilig sini amo bangud nga indi pareho sa skin tattoos nga permanente ang agi, ang tooth tattoos pwede lang maislan pinaagi sa pag-ilis sang crown.
May iban nga nagaangkon nga ang skin tattoos laos na kag ang tooth tattoos amo ang bag-o kag cool nga pamaagi para ma-express ang kaugalingon, samtang ang iban nagapangusisa man kun gina-offer ini sa mga dental clinic.
Imbes nga plain lang nga crown, pwede sila makakuha sang personalized nga model depende sa ila taste ukon sa kun ano ang makadala sa ila sang swerte.
Sa pagpili sang tooth tattoos, may iban nga nagapili nga ibutang ang initials sang ila romantic partners, ang ila lucky numbers, ukon maski mga pulong nga naga-engganyo sang suerte pareho sang “making money” ukon “achieving goals.”
Naglab-ot na ini nga trend sa kasikatan amo kun ngaa may mga daku nga dental clinics nga naga-anunsyo sang tooth tattoos bilang libre nga bonus kun magpaplastar ka sang crown sa ila branches.
Bisan pa nga ang tooth tattoos nagabaton sang madamo nga positibo nga feedback sa Chinese social media subong, indi tanan naga-rekomendar sini. Isa ka dentista sa Shanghai nagsiling sa China.com nga ang pag-ukit sang mga letra ukon disenyo sa crowns indi medically recommended tungod nga mahimo sini mapaluya ang crown tubtob sa maguba ang mismo nga ngipon.