Ginkumpirmar ni Department of Justice Secretary Jesus Crispin Remulla ginakonsiderar na bilang ‘Protected Witnesses’ ang duha ka mga DPWH Engineers sang Bulacan nga sanday Brice Hernandez kag Henry Alcantara kaupod ang mag-asawa nga contractor nga sanday Curlee kag Sarah Discaya.
Nahibaluan nga ginsumiter na ni anay Assistant District Engineer Brice Hernandez ang Central Processing Unit (CPU) sang iya desktop Computer sa iya pag-atubang sa Department of Justice kag gilayon man nga ginproseso sang departamento.
Kaupod sini ang anay Assistant Engineer man nga si Jaypee Mendoza nga pareha nga nagsumiter sa DOJ sang ila ‘Sinumpaang Salaysay’ ukon ‘Sworn Statement’
Si Hernandez, kaupod si Mendoza kag si anay DPWH District Engineer Henry Alcantara ang ginpasulod na ni Remulla sa idalum sang Witness Protection Program bilang Protected Witnesses.
Suno kay Secretary Remulla, igahatag sa mga ini ang nagakaigo nga proteksyon nga ila kinahanglan agud magpadayun ang mga rebelasyon may angut sa isyu nga ila gina-atubang.
Pahayag sini, kinahanglan sang DOJ ang oras kag kooperasyon sang mga protected witnesses kag magsumiter pa sang dugang kag nagakaigo nga dokumento.
Sa bahin naman sang mga Discaya, ginpahayag ni Remulla nga ginakonsiderar naman ang mga ini bilang ‘Protected Witnesses’.
Ini agud mangin fair para sa mga nag-apply nga magpaidalum sa programa.
Suno kay Remulla, ang mga Discaya ang buligan may angut sa ila problema sa seguridad.
Pagklaro naman sang DOJ Secretary, lain naman nga istorya ang pagpaidalum sa ‘State Witness’.
Pahayag sini, malawig nga proseso ang obra agud mangin ‘State Witness’ kag bangud gina-hilway na sa ‘Criminal Liability’ ang kun sin-o man ang mapaidalum diri.
Nahibaluan nga bilang ‘Protected Witness’, ginahatagan sang legal nga seguridad batok sa mga pagpamahog sa ila kabuhi apang sila ang indi pa mahilway sa ila kaso nga gina-atubang.