Anay DPWH USec Bernardo ginbuyagyag ang pila ka mga pangalan sang opisyal sang gobyerno
Ginbuyagyag ni Former DPWH UnderSecretary Roberto Bernardo sa ika-anum nga hearing sang Senate Blue Ribbon Committee ang mga pangalan nga gina-alegar may kaangtanan sa mga anomaliya kag nagabaton sang kickback sa mga flood control projects.
Suno kay Bernardo, ini ang ginalakipan sanday anay Senate President Senator Chiz Escudero, Senator Nancy Binay, anay Senator Bong Revilla, kaupod si Ako Bicol Partylist Rep. Zaldy Co kag former DepEd Undersecretary Trygve Olaybar kag ang talatapan sang Office of the Executive Secretary.
Base sa sworm affidavit nga ginpahayag mismo ni Bernardo, ginpahayag sini nga 25 percent ang komisyon nga ginhatag kay Congressman Zaldy Co samtang duha ka porsyento naman ang ginatunga sini kay Engineer Henry Alcantara.
Dugang pa sini, 20 percent naman ukon yara sa 160 milyon pesos ang nahatag kay Senator Escudero pinaagi sa abyan sini kag campaign contributor nga si Meynard Ngu samtang si Olaybay naman ang nagapangayo sang 15 percent nga komisyon gikan sa P2.8 bilyon nga balor sang proyekto samtang 15 percent naman ang gina-alegar ginapangayo sang staff ni anay Senador kag karon Makati City Mayor Nancy Binay.
Matapos nagpahayag sang iya statement, personal nga gin-aku ni Bernardo ang iya sala nga ginhimo kag ginpabay-an ang iya kaugalingon nga mangin instrumento sang mga malain nga gawi.
Sa pihak nga bahin, ne-mensyunar naman ang pangalan ni anay House Speaker Martin Romualdez kaupod si Zaldy Co nga nagabaton sang kwarta nga personal nga ginadul-ong ni Orly Regala Guteza nga anay Security Consultant ni Zaldy Co nagtindog bilang panibag-o nga witness.
Suno kay Guteza, indi lang seguridad ang ginasiguro sini kundi ang pagdulong sang mga bags nga ginapahayag unod ang madamo nga kwarta nga suno kay Guteza, yara sa kapin 48 million pesos.
Matapos naman nga mamensyunar, gilayon nga nagpagwa sang statement sanday si Escudero, Binay, Romualdez kag nagapanindugan wala sang kaangtanan kag ginapanindugan ang pag-deny may angut sa mga nangin pahayag sang mga resource person sa hearing.
Natalana naman nga iga-evaluate sang Department of Justice ang affidavit ni Bernardo kag lakip na ang hinyo sini nga ipaidalum sa Witness Protection Program.