Klase sa Negros Occidental suspendido sini nga adlaw Napulo ka mga LGU nagdeklalar work suspension
Suspendido ang klase sa tanan nga lebel sa pribado kag pampubliko nga eskwelahan sa probinsya sang Negros Occidental sini nga adlaw.
Ini matapos nalakip ang probinsya sa Memorandum Circular No. 102 nga ginpagwa sang Malacañang kasunod sang rekomendasyon sang National Disaster Risk Reduction and Management Council bangud sang nagapadayun nga pag-inulan tuga sang Habagat nga ginapabaskog pa sang Bagyong ‘Opong’.
Nahibaluan nga pila sa mga ciudad kag banwa sa Norte nga bahin sang probinsya ang ginpaidalum sa Tropical Cyclone Wind Signal No.1 nga ginalakipan sang banwa sang Toboso, Calatrava, EB Magalona Don Salvador Benedicto, Murcia kag ang mga ciudad sang Escalante, Sagay, Cadiz, Victorias, Silay, Talisay, kag ciudad sang Bacolod.
Bangud sang mainulanon nga panahon, napulo naman ka mga LGU sa probinsya ang nagdeklalar sang work suspension sa mga opisina sang gobyerno kun sa diin lakip diri ang banwa sang EB Magalona, Cauayan, Binalbagan, Hinobaan kag mga ciudad sang Sipalay, Himamaylan, Silay, Victorias, La Carlota kag ciudad sang Cadiz.
Sa pihak sini, magapabilin naman nga operational ang mga essential agencies sang gobyerno lakip ang nagahatag sang serbisyo sa bahin sang disaster response, health kag vital services.