PROVINCIAL CAPITOL – Yara pa sa kapin 25,000 ka cubic meters (m3) sang volcanic sediments gikan sa Bulkan Kanlaon ang nabilin nga wala mahakot gikan sa Ibid Creek sa Sitio Tamburong, Barangay Biaknabato sa banwa sang La Castellana.
Ini ang ginpresentar sa ginpatigayon nga 65th Mount Kanlaon Natural Park Protected Area Management Board En Banc Meeting sa Capitol Social Hall kahapon.
Sa inisyal nga assessment, nagdangat sa 27,328.28 m3 sang volcanic sediments ang nagsupot sa sapa apang yara na sa kapin 2,139 m3 ang tigayon nga nahaw-as sa ginpatigayon nga clearing operation sang Provincial Government upod sa LGU sang La Castellana.
1,604.06m3 diri ang gintampok sa daan nga bulangan samtang 93.61m3 ang ginsaylo sa MKNP Office compound.
Sa pihak sini, may nabilin pa nga 25,189.28m3 sang volcanic sediments ang kinahanglan nga haw-ason sa Ibid Creek.
Nahibaluan nga sa MKNP-PAMB En Banc meeting kahapon, gin-aprubahan ang resolution nga nagahingyo kay Environment Secretary Raphael Lotilla nga hatagan sang authority si Governor Bong Lacson nga mag-issue sang special permit para sa pag-clear sang sapa gikan sa nagmala nga lahar.
Ang resolusyon ang igapadala sa DENR Central Office agud desisyunan sang tiglikom.
Una na nga ginduso sang gobernador ang commercial clearing ukon ang paghakot sang pribado nga mga contractors agud mapadasig ang paghawan sang sapa.