Isa ka Mexicano nga lalaki ang nagareklamo batok sa iya ex wife kag bag-o sini nga partner nga isa ka plastic surgeon matapos nga nagapati ini nga sila ang rason kun ngaa ginbawian sang kabuhi ang iya 14-anyos nga anak nga babayi. Nagapati ang mexicano nga ginsekreto sang iya anak ang pagpabutang sini sang breast implants kag ang nasambit nga operasyon ang ginregalo sang iya iloy sa iya. Si Paloma Nicole Arellano Escobedo ang nagtaliwan sa isa ka ospital sa Durango, Mexico, matapos siya nag-antos sang cerebral edema nga gin-angot sa isa ka balatian sa pagginhawa. Apang ang iya amay nagapanindugan nga indi ini ang matuod nga rason sang iya kamatayon kag wala ini sang labot sa opisyal nga report. Gin-akusar ni Carlos Arellano ang iloy ni Paloma kag ang iya nobyo nga plastic surgeon nga amo ang nagpatigayon sang operasyon sa iya anak nga babayi, lakip na ang breast enhancement surgery, nga wala sang iya pahanugot. Suno sa balita sa Mexico, ginpaidalom si Paloma sa madamo nga operasyon pareho sang breast augmentation, Brazilian Butt Lift, kag liposuction. Suno sa amay, nakabutang sa death certificate nga ‘respiratory illness’ ang rason sang kamatayon agud tabunan ang kamatuoran. Bangud sang duda, diri nagpasaka sang reklamo si Carlos pagkatapos sang lubong sang iya anak, nga nagapanindugan nga “may yara pa gid rason sa iya pagtaliwan” kag ginapasangdan niya ang iya anay asawa sang pagtabon sang kamatuoran.
