BACOLOD CITY- Padayon sa karun ang backtracking sang Bacolod City Police Station 3 angot sa pagpangluthang sa mag-utod sa Purok Active, Barangay Mandalagan sa ciudad sang Bacolod, pasado las-8 sang aga, September 29.
Ang nagtaliwan ang ginkilala nga si Harold Espina, legal ang edad, backrider sa motorsiklo nga ginamaneho sang iya manghud nga si Harley Espina, nga pilason naman sa amo nga pagpangluthang.
Base sa pahayag ni Police Major Rondly Tapang, Station Commander sang Police Station 3, may nakuha na nga CCTV footage ang kapulisan apang indi ini klaro, rason nga sila ang nagapangita pa sang dugang nga CCTV.
Suno sa himata sang mga biktima, wala nakabaton sang pagpamahog si Harold antes ang krimen, apang nahibaluan nga ang narekober nga armas-luthang sa nagtaliwan ang isa lamang ka pagpangaman angot sa ila nga negosyo nga karenderya.
Samtang, ginpaidalom naman sa operation si Harley matapos nakaagom sang gunshot wound sa likod.
Sa karun wala pa natumod sang kapulisan ang motibo sa pagpangluthang sa mag-utod.
Dugang pa ni Tapang, wala sang kriminal rekord sanday Harold kag Harley.