BACOLOD CITY- Dakop ang suspek sa pagpamuno sa Barangay Singcang Airport sa tinalikdan nga Setyembre 23 matapos nga ini ang nagpalupok sang armas luthang sa bahin sang Runway Old Airport sakop sang Barangay Tangub sa ciudad sang Bacolod, pasado las-9 sang gab-i, Setyembre 28.
Ang suspek ang ginkilala nga si alias “Parcon”, 48-anyos, residente sang Purok Pag-asa, Brgy Mabini, Pulupandan.
Base sa pahayag ni Police Captain Greeky Cayao, Station Commander sang Police Station 8, may nagreklamo batok kay Parcon bangod sa iya pagpalupok sang armas; sa pagresponde sang kapulisan, narekober sa suspek ang 38 caliber, tatlo ka bala, kag isa ka basiyo sang bala.
Sa pagtsekyar sa background sang suspek, nadiskubrihan nga siya ang nagbuno kay alias “John Paul” sang Brgy. Alijis kun sa diin gina-alegar love triangle ang motibo.
Suno kay Cayao, si Parcon ang na convict sadto sa kaso nga carnapping rason nga napreso ini sa New Bilibid Prison kag kaagi man dakop angot sa illegal nga droga.
Sa karun napasaka na ang kaso nga murder batok kay Parcon kag natalana man magapangatubang sang kaso nga Illegal discharge of firearm in relation to violation of RA 10591.