Arestado ang 26-anyos nga lalaki sa ginpatigayon nga drug buy-bust operation sang Police Station 8 alas-7:29 sini nga gab-i, Oktubre 2, 2025 sa Calong-Calong, Zone 3, Bangga Saling, Barangay Singcang-Airport, Bacolod City.
Ginakabig nga isa ka High Value Individual (HVI) ang BADAC listed nga subject sang buy-bust nga ginkilala kay alyas “Pindot” nga residente sang Purok Langis, Barangay Banago sa nasambit nga ciudad.
Suno sa PS 8, nagabug-at sang ginabulubanta nga 170 ka gramos ang narekober nga ginaalegar ilegal nga droga.
Magluwas sa ini, nakumpiskar man ang isa ka belt bag nga nagaduag itom, motorsiklo, kag ₱1,000 nga gingamit sa buy-bust.
Yara na ang suspek sa kustodiya sang mga pulis para sa nakaigo nga disposisyon.