BACOLOD CITY- Ginkabig sang Bacolod Local Government Unit nga unsafe ang apat ka nga classroom sa ciudad, base sa report sang Department of Education (DepEd) matapos ang nagluntad nga linog.
Ginpahayag ni Mayor Greg Gasataya, sa 70 ka eskwelahan sa ciudad, nagreport ang DepEd nga may tag-isa ka classroom sa apat ka eskwelahan ang may structural damage kun sa diin ini ang indi safe nga gamiton sang estudyante ukon manunudlo.
Ginalantaw nga possible nangin contributing factor ang linog sa pagkaguba sang amo nga mga classroom.
Natalana nga pagakadtuan sang City Engineer’s Office ang apat ka mga classroom agod makapatigayon sang assessment kag recommendation.
Magluwas sa eskwelahan, nagpatigayon naman sang rapid damage assessment and needs analysis ang Bacolod ang City Disaster Risk Reduction Management Office (DRRMO), kaupod ang City Engineer’s Office (CEO), kag Office of the Building Officials (OBO) sa 15 ka mga buildings sa ciudad kun sa diin pila diri ang may yara sa minor crack sa wall apang wala ini nalakip sa structural members.
Gintsekyar man ang 13 ka nga taytay sa ciudad, kag wala sang may nakita guba ukon depekto.
Bangod wala sa may narekord nga major damage ang nagluntad nga linog, nagdesisyon ang alkalde nga magabalik na ang klase kag trabaho bwas nga adlaw, Oktubre 2 sa ciudad.