BACOLOD CITY- Nadiskubrihan ni Bacolod City Councilor Jun Gamboa nga wala sang business permit sang nagligad nga tatlo ka tuig ang BACIWA-PrimeWater.
Ginpahayag ni Councilor Gamboa, sang iya ginpanaugan sang resolution ang BACIWA-PrimeWater iya nadiskubrihan nga wala ini sang business permit sumugod sang tuig 2022.
Suno sa konsehal, sini nga September 2025 lamang naghingagaw ang water provider sa pagkuha sang permit kun sa diin ila ginbayaran ang nagakaigo nga balayran sa ciudad.
Sa karun ginakwestyon ni Gamboa ang amo nga insidente bangod apisar nga wala sila sang business permit sang tinalikdan nga mga tinuig, padayon ang ila nga operasyon.
Tuyo man ni Gamboa nga hibaluon ang income ukon financial statement ang BACIWA-PrimeWater; madumduman una na nga ginsiling sini nga iya ginaduso nga isuspende ang business permit sang water provider.