Nagdangat sa P54.5 million ang kabug-usan nga kita sang probinsya sa ginpatigayon nga ika-39 nga Negros Trade Fair sa SM Aura Premier sa Metro Manila nga nagsugod humalin Setyembre 23 tubtob Setyembre 28.
Base sa report, yara sa P97 million ang natigayon nga business-to-business transactions kag nakarekord sang 41,000 ka mga visitors sa sulod sang anum ka adlaw.
Gamit ang ‘Himbon’ bilang tema, ginpakigbahin sang ginakabig ‘longest-running provincial trade fair’ang platform sini sa pagdul-ong sang economic, social, kag environmental impact para sa NIR sa suporta sang Provincial Government sang Negros Occidental sa pagpanguna ni Governor Eugenio “Bong” Lacson.
Sa nasambit nga trade fair, isa ka local food processor ang naka-secure sang iya pinakauna nga first export order samtang ang iban ang naka-deal sa mga national distributors kag manufacturers.
Nahibaluan nga yara sa 375 ka mga DTI kag LGU-assisted microenterprises ang natagaan sang opurtunidad nga maka-marlet test sang ila mga produkto.
Nalakip man diri ang 113 ka mga small and medium enterprises nga miembro sang Association of Negros Producers and Negrense-owned companies.
Labaw sa negosyo, isa sa mga ginpresentar sang mga Negrense ang pagselebrar sang kultura, bugal, kinaiya, pagpasanyog sang palangabuhinan kag paghatag sang inspirasyon sa mga negosyante.
Sa ika-39 nga tuig, ang Negros Trade Fair ang padayun nga magapakita kag magapresentar sang resilience, innovation, kag entrepreneurial spirit sang mga Negrense.
[Photos from PGNO]