NEGROS ISLAND REGION- Temporaryo nga gin-untat sang Commission on Election- Negros Island Region (COMELEC- NIR) ang preparasyon para sa Barangay and Sangguniang Kabataan Elections (BSKE) 2025 nga natalana kuntani sa Disyembre 1.
Ginpahayag ni Atty. Lionel Marco Castillano, Regional Election Director sang COMELEC- NIR, ila temporaryo nga gin-untat ang preparasyon para sa eleksyon sini nga tuig, samtang nagahulat sang decision sang Supreme Court angot sa pending petition sa pag-kwestyon sang constitutionality sang pag-pagpostpone sang December 2025 BSKE kag sa baylo ini ang pagahiwaton sa November 2026.
Apang indi buot-silingon wala sang possibilidad nga magadayon ang eleksiyon sini nga tuig.
Suno kay Atty. Castillano, ila man ginahulat ang mando ni COMELEC Chairman George Garcia sa pagbalik sng voters registration sini nga bulan sang Oktubre lakip na ang pagbaton sang transfer of registration.
Sa pagbalik sang registration, magabalik man ang satellite registration sa mga mall, eskwelahan, sa mga mountain barangay, kag island barangay; kadungan sina, magapatigayon ang COMELEC sang voters education kaupod ang Parish Pastoral Council for Responsible Voting (PPCRV).