Nagapadayon asta karon ang rescue operation sang Bacolod City Anti-Mendicancy Taskforce batok sa mga badjao nga nagapangalimos diri sa ciudad.
Sa interview sang DYHB kay Anti-Mendicancy Taskforce head Anjenette Servano, ginpahayag sini nga September 11 pa sila nag-umpisa sa ila nga operasyon kag sa subong, may siyam na sila nga na-rescue halin sa Bredco.
Base sa ila ginpatigayon ng profiling, kapin 44 ka mga badjao ang yari diri karon sa Bacolod City.
Nahibaluan man nga kalabanan sa mga ini ang naghalin pa sa Negros Oriental kag Cebu.
Sa madumduman, isa ka badjao ang nag-viral online tinalikdan nga semana matapos ginaalegar mga nagapamilit kag nagapamahog ini sa mga pasahero sang jeep nga indi maghatag sang kwarta sa iya.
Suno kay Servano, ang nasambit nga lalaki ang nakaagi na detain sa police station matapos sini gin-harass ang isa man ka babayi nga pasahero.
Ginapanugyan karon sang opisina nga kun mahimo, i-report man sang iban nga biktima sa kapulisan ang indi maayo nga ginaubra sang mga badjao.
May angut sini, gin-amendahan naman ang City Ordinance 146 ukon ang anti-mendicancy ordinance sa diin may igapatuman na nga mga nagakaigo nga penalidad sa mga wala nagasunod diri. Nalakip diri ang P200 nga mults kag tubtob anum ka bulan nga pagkapreso.