Ginkumpirmar ni Mayor Greg Gasataya nga ginpasakaan sa ₱3 million ang donasyon sang Bacolod City para sa mga nalinugan sa probinsiya sang Cebu.
Madumduman nga una na nga gin-anunsiyo sang alkalde nga maga-donate ang ciudad sang ₱2-M para sa mga biktima sang linog sa Bogo, Cebu. Apang nadesisyunan sang city government nga pasakaan ini sa ₱3-M para makabulig sa iban pa nga mga lugar sa probinsiya sang Cebu.
Suno kay Mayor Gasataya ipaagi sang ciudad sa provincial government sang Cebu ang donasyon.
Magapangayo pa sang authority ang alkalde gikan sa city council para magpirma sang memorandum of agreement (MOA) sa provincial government sang Cebu. Suno kay Mayor Gasataya, isa ini sa mga guidelines sang Commission on Audit (COA) nga dapat sundon sa isyu sang mga donasyon.