Ginbawian gid sang kabuhi ang isa na rider sang motorsiklo matapos ini makabunggo sa salakyan nga iya nasugata sa intersection sang Burgos- Lacson, sakop sang Barangay 19, Bacolod City las-3 sang kaagahon kahapon, October 12,2025.
Ginkilala ang biktima kay alyas Scotch, 28-anyos, residente sang Sagay City kag nagamaneho sang motor nga scooter samtang ginkilala naman kay Alyas Zhiyong, isa ka Chinese National kag temporaryo nga nagapuyo sa Barangay Villamonte, Bacolod City ang driver sang salakyan.
Base sa inisyal nga imbestigasyon sang kapulisan, natukiban nga halin west padulong east nga direksyon ang motor samtang halin south padulong north naman ang salakyan sang nagsalpukanay ang mga ini sa tunga dalan.
Bangud sang impact, nakaagum sang patal nga pilas si Scotch kag gindala pa sa ospital ugaling lang makaligad ang masobra isa ka oras, ginbawian ini sang kabuhi.
Sa pihak nga bahin, nagapabilin naman karon sa kustodiya sang kapulisan si Zhiyong para sa insakto nga disposisyon.