Nabiktima sang mga pickpocket nga plaza girls ang isa ka Manileño nga naglagaw diri sa Bacolod City sini nga Masskara Festival.
Nagdangup sa Sentro Serbisyo si Allen Richmond, 30-anyos, residente sang Mandaluyong City matapos nga ginkawat ang iya cellphone nga POCOM 3 kag wallet nga may unod UMID, National ID, Debit Card kag balor P4,000 nga cash.
Suno may Allen, October 9 sang nagbiyahe siya halin Manila padulong Iloilo kag pagka hapon nagsakay siya sa roro padulong naman sa Bacolod.
Sang nagalakat-lakat ini sa Plaza, hinali lang may nag-akbay nga babayi sa iya kag naglingaw istorya.
Liw-as sa iya ihibalo, may isa pa ini ka upod nga naga-ukay sa bulsa sang iya bag kag didto ginkuha ang wallet kag cellphone.
Panugyan ni Allen sa iban pa nga mga turista nga maghalong gid pirme ilabi na kun yara sa pangpubliko nga lugar kag kun dulom na.
Nagpadulong sa Bacolod City ang biktima agud ‘first time’ kuntani nga masaksihan ang Massakara Festival.