Siling nila kalabanan sa mga nagakadayunay nga magkahagugma amo ang pareho itsura. Kaangay man sini ang isa ka mag-asawa halin sa probinsya sang Guangdong, China nga nag-viral sa social media bangud sang ila identical nga itsura, nga amo ang nagtuga sang kontrobersiya sa mga tawo nga basi mag-utod ang mga ini nga nagbulagay lang. Sanday Liang Caiyu kag He Xiansheng, pareho yara sa ila 20’s ang nagapanag-iya sang isa ka herbal medicine shop sa Dongguan, probinsya sang Guangdong. Bisan pa nga pareho sila halin sa mga pamilya nga may malawig na nga kasaysayan sa tradisyonal nga pagpangbulong, nangin mabudlay para sa ila nga pasanyugon ang ila negosyo asta nga nag-umpisa sila maghimo sang mga promotional clips sa “Douyin,” nga amo ang TikTok sang China. Bangud nga ila man na piyaran ang pagkapareho sang ila nga nawong, ginkumbinse man ni Liang ang iya bana nga mag-upod sa pag ubra sang funny clips sa diin naga “twinning” ang mga ini sa ila videos. Sa subong, ang ini nga mga clips ang ginagamit na sang mag-asawa bilang promotional videos sa ila negosyo. Suno kay Liang, “sang una namon nga nagkilalahay, wala ko gid nakita nga pareho kami itsura, apang sang nag-upod na kami kag nangabuhi didto ko lang nabal-an nga daw pareho gid kami nawong.” Bisan pa nga si He natural nga mahuluyaon kag indi mahilig makita sa spotlight, nagsugot man siya nga mag-upod sa viral nga mga video sang iya asawa, kag maski magbayo pa sang biste sang babayi para lang mapakita nga daw kapid gid sila. Wala nagdugay, nagdamo ang ila mga followers nga nagasubaybay sa ila page, indi lang para sa herbal plants kundi para makita ang mag-asawa nga daw kapid. Kumento naman sang pila ka mga netizen nga dapat magpa-DNA test ang mga ini kay basi mag-utod sila nga nagbulagay lang.
