Magahatag ang city government sang Bacolod sang push carts para sa mga ambulant vendors sa Bacolod City Public Plaza. Ini ang patigayunon sang City Cooperative and Livelihood Development Office (CCLDO).
Kabug-usan nga 31 ka mga vendors ang magabaton sang push carts. Ang tagsa ka push carts nagabalor sang ₱15,000 kag may kabug-usan nga pondo nga ₱465,000. Tinutuyo sang sini nga proyekto nga mangin organized kag malimpyo ang mga nagabaligya sa plaza.
Ang pondo para sa proyekto magahalin sa 20% nga development fund sang ciudad. Suno kay Mayor Greg Gasataya, napirmahan na sini ang program of work para diri kag resulta man ini sang mga konsultasyon sa mga vendors.
Madumduman nga sang Agosto, ginpaidalom man sang CCLDO sa livelihood training ang mga katapo sang Bacolod Public Plaza Vendors Association. Ang mga katapo sang asosasyon ang gintudluan nga maghimo sang longganisa, beef tapa kag dishwashing liquid. | DYHB News