BACOLOD CITY- May person of interest na ang Bacolod Police Station 1 angot sa nasapwan nga bangkay sang 17-anyos nga dalaga sa reclamation area sakop sang Brgy. 12, pasado la-una sang hapon, Oktubre 22.
Ang biktima ang trainee sang isa ka construction supply company nga nahamtang sa Brgy. Villamonte, kag naga-board sa bahin sang dalan Gatuslao.
Ginpahayag ni Police Captain Francis Depasucat, Station Commander sang Police Station 1, yara sa isa tubtob duha ang ila ginalantaw nga person of interest.
Sa karun padayon ang backtracking sang kapulisan kun sin-o ang ulihi sini nga upod matapos nagbiya ini sa boarding house bangod possible may ginkadtuan ini nga lugar ukon may gintabo.
Suno kay Depasucat, naka-request naman sila sa mga pribado nga establisyemento agod makakuha sang kopya sang CCTV footage.