BACOLOD CITY- Natalana nga igapaidalom sa autopsy ang bangkay sang 17-anyos nga dalaga nga nasapwan sa reclamation area sakop sang Barangay 12 sa ciudad sang Bacolod, kahapon nga adlaw, Oktubre 22.
Ang biktima ang trainee sang isa ka construction supply company nga nahamtang sa Brgy. Villamonte, kag naga-board sa bahin sang dalan Gatuslao.
Base sa pahayag ni Police Captain Francis Depasucat, Station Commander sang Police Station 1, natalana nga ipaidalom sa autopsy ang bangkay agod matumod kun ano ang gintunaan sang kamatayon sang biktima.
Sa inisyal nga nakita sa lawas sang biktima, may yari ini sang laphag sa nagkalain-lain nga bahin sang iya lawas, kag pilas sa nawong.
Sa karun padayon nga ginahibalo sang kapulisan kun sin-o ang sa likod sa amo nga krimen.