Ginaduso ni Bacolod City lone district Congressman Albee Benitez ang “transparency” sa bug-os nga Visayan bloc agud nga mabalik ang pagsalig sang publiko sa konggreso.
Sa interview sang DYHB kay Benitez, ginpahayag sini nga “Transparency through technology” ang luyag niya nga tutukan pinaagi man sa paggamit sang artificial intelligence (AI) kag mga digital platforms.
Suno kay Benitez luyag niya nga makita man sang mga tawo ang dako nga importansya sang teknolohiya.
Bangud sini, nag-file siya sang bill nga nagaduso sini.
Sa pihak nga bahin, ginpahayag man ni Cong Albee nga sa sulod sang 100 days sini nga pagpungko bilang representante sang Bacolod sa Konggreso, iya ginatrabaho ang transparency reforms kasubong man ang pag-file sang mga resolution nga magahatag sang atensyon sa mga programa nga mapuslan sang publiko.
Kaangay sini amo ang food security ilabi na sa rice production kag pagpanubo sang presyo sang kuryente batok over contracting.