Padayon nga ginapanawagan ni Councilor Wilson “Jun” Gamboa nga i-takeover na lang liwat sang Bacolod City Water District (BACIWA) ang operation sang Primewater bangud sang palpak sini nga pagserbisyo sa mga konsumidor.
Sa interview sang DYHB kay Gamboa, ginpahayag sini nga indi na dapat pa paghatagan sang business permit ang Primewater bangud naga-operate man gani ini sa sulod sang tatlo na katuig nga wala sang permit.
Sa ginpatigayon nga meeting tinalikdan nga Martes, October 21, nagsinapol ang mga BACIWA board upod si Bacolod City lone district Congressman Albee Benitez, Vice Mayor Kalaw Puentevella kag representative ni Mayor Greg Gasataya sa diin ila gin-istoryahan ang panawagan sang Amlig tubig kag iban pa nga sektor nga ang BACIWA na lang liwat ang maga-uyat sa operasyon.
Pila sa mga ginpamangkot ni Cong Albee amo ang kun bala masarangan ini sang BACIWA?, may kapital ang BACIWA?, kag kun pila ang kinahanglan para masuguran na ini?
Suno kay Councilor Gamboa, masarangan ini sang BACIWA bangud may P100 million per year man ini nga net income kag may capital expenditure (CAPEX) man nga available kun kinahanglanon.
Suno kay Gamboa, tion na para mauntat ang paghuthot sang Primewater sa financial resources sang BACIWA.