PROVINCIAL CAPITOL – Nagabulig ang Department of Public Works and Highways Negros Island Region sa clearing operation sa naibabaw nga bahin sang Ibid Creek sa Barangay Biaknabato, banwa sang La Castellana.
Ginpahayag ni La Castellana Incident Management Team Commander Remuel Lajo nga nagpadala sang backhoe kag dumptruck ang DPWH agud maghawan sang sapa gikan sa dalagku nga mga bato.
Nahibaluan nga ang clearing operation ang ginpatigayon kasunod sang pagnabaw sang sapa bangud sang pagsupot sang bato kag balas nga ginbuga sang Bulkan Kanlaon nga nag-upod sa daludo sang tubig.
Sa madumduman nga temporaryo nga nagdulog sang clearing operation ang Provincial Government bangud nagaupod gihapon ang balas sa daludo sang tubig kag subong man, napuno na ang lugar nga gintampukan sang ginhaw-as nga volcanic sediments.
Suno kay Lajo, nag-us-os na ang balas sa pihak nga bahin sang tamburong nga sakop na sang Sitio Ibid, Barangay Cabacungan, nga saguwa na sang protected area.
Wala naman nagaawas ang tubig sa sapa kag pagahulaton na lamang ang pag-issue ni Governor Bong Lacson sang special permit agud makuha ang amo nga balas.*Remuel Lajo photos