PROVINCIAL CAPITOL – Indi sa gihapon sarang magamit sang mga pumuluyo sa Barangay Mailum sa ciudad sang Bago ang source sang tubig sa ila nga lugar.
Ini matapos nga nakontaminar sang ashfall ang kuluhaan sang tubig sa amo nga barangay kasunod sang explosive eruption sang Bulkan Kanlaon sadtong Oktubre 24 sang gab-i.
Paathag ni Bago City DRRMO Head Dr. Merijene Ortizo, wala pa mapaidalom sa physicochemical analysis ang mga source sang tubig sa nabukid nga bahin sang ciudad.
Ang nasambit nga test ang maga-determinar kun safe na nga inumon kag gamiton sang mga pumuluyo ang makuha nga tubig.
Sa karon, nagapakig-angot na ang Bago DRRM sa Water Sanitation and Hygiene Cluster agud makakuha na sang sample sa mga water sources sa labing madali nga panahon.
Bangud sini, ang Bago City LGU ang nagapadala sang tubig sa nagkalain-lain nga purok sang Barangay Mailum, particular sa Kakapihan 1 kag 2 kag subong man sa Purok Pili samtang bukas man sila nga maghatag sa mga pumuluyo sa katupad nga mga barangay.*Bago CDRRMO Photos