Indi upang para sa isa ka sultero ang iya kasablagan sa lawas agud maghimakas para makabulig sa iya pamilya. Halin sang pagbun-ag kay Ryan “Ipoy” Moralidad, 24-anyos sang Tulunan, Cotabato, wala na ini sang mga tiil, apang indi ini nangin problema para magpaninguha siya sa pangabuhi. Bangud sa iya sini nga ginapakita nga kapag-on sa pqgpangabuhi, madamo sang nagabilib kag na-inspire sa iya nga determinasyon nga magpadayon. Sa pihak sang tanan nga ini, masarangan sa gihapon ni Ipoy nga ubrahon ang mga butang nga ginaubra sang mga tawo nga kumpleto ang parte sang lawas. Para mabuhi kag makakwarta, nagahimo ini sang uling kag nagabulig sa iya pamilya sa pagpanguma agud may igasto sa pang-adlaw-adlaw. 18-anyos palang si Ipoy, siya na ang nagtindog nga haligi sang panimalay matapos nga nagtaliwan ang iya nga amay. Sa karon, sila nalang sang iya iloy kag mga utod ang nagapangabuhi. Handum sini nga mangin isa ka negosyante sa palaabuton.
