PROVINCIAL CAPITOL – Gina-finalize na sa karon sang Provincial Government sang Negros Occidental ang legal nga mga dokumento para sa pagpatigayon sang Bulk Water Supply Project.
Ginpahayag ni Provincial Administrator Atty. Rayfrando Diaz II nga gin-aprubahan na sang Sangguniang Panlalawigan sa ila nga regular session sang nagligad nga Martes ang nabilin nga P314 million sa P520 millon nga kinahanglanon para sa Phase I sang proyekto.
Suno kay Diaz, ila na ginatapos ang terms of reference kag ang tanan nga financial kag technical documents agud masuguran na ang bidding process nga ila ginalauman matigayon sa una nga bahin sang Oktubre.
Ginpaalinton sang provincial administrator nga handa na ang intake point pakadto sa bulk water treatment facility sa Barangay Guimbalaon, Silay City.
Ang Phase II, nga punduhan sang P600 million, ang pagalakipan naman sang pagpangplastar sang conveyance pipes halin sa treatment facility padulong sa mga ciudad sang Silay, Talisay kag Bacolod.
Bilang host city, prayoridad ang Silay City apang suno kay Atty. Diaz, padayon pa nila nga ginahulat nga mahatagan sang resolution of no objection sang Sangguniang Panlungsod ang proyekto.
Sa kabug-usan, ang Bulk Water Supply Project ang magabalor sang P1.1 billion nga magahalin sa pundo kag savings sang Provincial Government kag ginalauman makaserbisyo na antes manaog si Governor Bong Lacson sa pwesto.
Ginpabutyag ni Atty. Diaz nga ginpili sang probinsiya nga indi na lang magkuha sang private partner agud masiguro nga manubo ang taripa kag barato ang bili sang tubig.
Plano nga itanyag ang tubig gikan sa Bulk Water Supply Project sa bili nga P14 kada cubic meter.