PROVINCIAL GOVERNMENT – Magasapol sa labing-una nga kahigayunan ang Regional Development Council (RDC) sang Negros Island Region sa Dumaguete City, Negros Oriental buwas nga adlaw, Agosto 13.
Ginpahayag ni Provincial Administrator Atty. Rayfrando Diaz II nga magatambong sa pagsinapol si Governor Eugenio Jose Lacson upod sa pila ka mga department heads sang Capitolio kag mga alkalde sang Negros Occidental.
Ginalauman man nga magatambong ang mga local nga opisyales sang Negros Oriental kag Siquijor.
Suno sa provincial administrator, isa ka organizational meeting ang hiwaton kun sa diin iga-set-up ang mga opisyal sang RDC kag mga komitiba sini.
Sa paglantaw ni Atty. Diaz, wala sang plano si Governor Lacson nga magpapili nga RDC chairman bangud ginapanguluhan na sini ang Regional Peace and Order Council (RPOC).
Nalakip man sa ginalauman nga matalakay sa RDC meeting ang pila ka economic agenda kag pagtukod sang mga ospital sa rehiyon.