Paglubog sang tubig sa ciudad masundan pa bangud sang valving nga himuon sang PrimeWater.
Madumduman nga sang nagligad nga semana na-eksperyensiyahan sang madamo nga barangay ang lubog kag mahigko nga tubod sang tubig.
Ginpaathag ni BACIWA General Manager Mona Dia Jardin nga ang natabo nga paglubog ukon turbidity sang tubig sang nagligad nga semana ang resulta sang ginhimo nga valving sang PrimeWater sa linya sang tubig sa Ramylu, Tangub.
Suno kay Jardin, may ginbuksan nga linya kag ginpasudlan tubig rason nga ang mga sediments ang na-flush out sa gripo sang mga kunsumidor.
Panindugan ni Jardin nga maayo ang intensyon sang valving bangud nga masuplayan na sang tubig ang mga area sang una nga wala nagatubod kag sa karon nagadangat na sa 108 MLD (million liters per day) ang water supply sa Bacolod.
Nagapaandam man si Jardin nga masundan pa ang valving bangud nga may mga dugang nga lugar nga masuplayan naman sang tubig gani paabuton na naman ang paglubog sang tubig.
Apang suno sa general manager, maga-coordinate na sila sa Liga ng mga Barangay agud nga makapahibalo nga daan sa mga residente. | DYHB News