Nag-request pa sang dugang nga pondo ang Department of Public Works and Highways (DPWH), Lone District of Bacolod sa Central Office agud tayuyon na nga ma-construct ang diversion channel sa Reclamation Area, Bacolod City.
Sa interview sang DYHB kay DPWH District Engineer Leah Jamero, ginpahayag sini nga ginkulang ang masobra P147 million budget para mahuman ang proyekto rason kun ngaa nag-request sila sang P125 million nga dugang para ibakal sang motor pump nga kinahanglanon agud magdiretso sa baybay ang matipon nga tubig baha sa palibot sang lugar.
Ginpasiguro ni Jamero nga sa tion ma approve na ang budget, sige-sige na ang pag-ubra sang diversion channel agud mangin operational naman ini.
Sa pihak nga bahin, gintalakay man ni Jamero ang mga proyekto sa idalom sang Legacy Construction Firm nga amo ang may pinakadako nga project sa tinalikdan nga tatlo ka tuig.
Suno kay Jamero, nakompleto na ang isa sini ka project sang 2022 kag duha ka proyekto sang 2023.
Ang ongoing na lang amo ang project nga ginsugdan sang 2024 dira sa area sang Barangay Pahanacoy nga karon 95% na nga human.
Ginpaathag ni District Enginer Jamero nga ang identification sang flood control projects sa ciudad ang nakabase sa naaprubahan nga feasibility study recommendation sang 2019-2020.
Samtang ang funding naman ang nagadepende sa funding constraints sang National Government. Ila lang iga plastar ang mga proyekto kag dira na sunod magaabot ang funding.