Natalana na nga magapauli bwas nga adlaw, August 16,2025 ang mga evacuees sang ciudad sang Bago kag La Carlota matapos ang pila ka bulan nga pagtinir sang mga ini sa mga evacuation centers tuga sang pagpamahog sang bulkan Kanlaon.
Sa interview sang DYHB kay Office of the Civil Defense- Negros Island Region (OCD-NIR) Director Donato Sermeno III, ginpahayag sini nga ang mga magapauli nga mga residente amo ang nga naga-istar sa 6km extended danger zone.
Sa karon, strikto nga ginadumilian sang ahensya ang pagtugot sa mga evacuees nga nagapuyo sa sulod sang 4km permanent danger zone (PDZ) nga makabalik sa ila tagsa ka mga panimalay ini bangud yara pa sa Alert Leverl 2 ang bulkan kag nagakadapat gid man nga wala sang naga-istar sa sulod sini.
Sa pihak nga bahin, una na nga nagpanawagan sang “bayanihan” ang Bago City LGU para sa mga pumuluyo nga nagub-an na sang balay kag P10,000 nga cash assistance para sa ila liwat nga pagpanugod.
Samtang padayon naman ang pagdeterminar sang LGU sang La Carlota sang kadamuon sang mga magapauli nga mga residente para sa bulig nga roofing materials para sa ila pag-repair sang mga puluy-an.
Sa pihak nga bahin, may kapin 61 pa ka mga pamilya sa banwa sang La Castellana ang nagapabilin sa mga evacuation centers.
Sila kag iban pa nga mga evacuees sa Canlaon City, Negros Oriental nga nagapuyo sa 4KM PDZ ang priority para sa resettlement program suno kay Sermeno.