Magahulat na lang ang probinsya sang Negros Occidental sa desisyon kag suhestiyon halin sa Central Philippines State University (CPSU) naangut sa duta nga ginatindugan sang eskwelahan nga amo ang ginapanag-iyahan sang pamilya Nazareno.
Ini kasunod sang kapaslawan sang probinsya nga mabakal sang P25 million ang masobra duha ka ektarya nga duta sang pamilya nga una na napaidalum sa usufruct agreement.
Sa interview sang DYHB kay Provincial Administrator Atty. Rayfrando Diaz II, ginpahayag sini nga bilang isa ka State University, nationally funded man ang CPSU.
Ang maubra lang sang probinsya amo ang tinguhaan nga mabuligan ang eskwelahan kag mga estudyante.
Suno kay Diaz nga sang naglupok ang ini nga issue, nag-panic man ang probinsya bangud sang kakulba nga mawad-an sang eskwelahan ang mga kabataan.
Panindugan pa sini nga budlay piliton ang isa ka butang ilabi na kun legalidad ang gina-istoryahan.
Pahayag pa sini nga indi makadayon bakal sang propedad ang probinsya kun kulang ang papeles sang tag-iya ka duta.
Pila sa mga nasambit nga problema amo ang TIN nga indi pagbatunon sang Bureau of Internal Revenue (BIR) nga kinahanglanon kun tani para sa pagkuha sang Certificate Authorizing Registration nga magasaylo sang titulo sang Nazareno pakadto sa Probinsya.
Pati ang Deed of Sale ang wala man sang pirma. Suno kay Diaz, tuman kadamo sang excuse sang pamilya Nazareno.
Sa karon, hulton na lang gid sang probinsya ang desisyon sang CPSU kag lantawon kun ano ang mabulig sini.