BACOLOD CITY- Ginserbehan sang warrant of arrest sa kaso nga pagpanghimulos ang suspek sa pagpanglabo sang tinalikdan nga Domingo, Agosto 17, sa Purok Paghidaet, Barangay Tangub sa ciudad sang Bacolod matapos nga ini ang nagsungka sa Criminal Investigation and Detection Group.
Ang suspek ang ginkilala nga si alias “Rafael”, 40-anyos, samtang ang biktima sa pagpanglabo amo si alias “Jeffrey”, 34-anyos, kag pareho residente sa amo nga lugar.
Ginpahayag ni Police Captain Greeky Cayao, Station Commander sang Police Station 8, updanay si Rafael kag Jeffrey nga nag-inom sang makahulubog nga ilimnon malapit sa balay sang suspek.
Makaligad ang pila ka minuto, nagpuli si Rafael sa iya nga balay kag nanutod sang daan nga goma sang motorsiklo, bangod sa tuman ka baho nga epekto sang amo nga pagpanutod, nag-ayo si Jeffrey nga ini ang untaton.
Apang ini ang ginkaakig sang suspek kag hinali nga ginlabo sa nawala nga kamot kag nawala nga ulo ang biktima gamit ang sundang.
Nasunog pa ang bahin sang balay ka suspek bangod iya ginhaboy sa sulod ang goma nga gintutdan.
Samtang gilayon naman nga gindala sa ospital ang biktima kag yara na sa karun sa maayo nga kahimtangan.
Suno kay Cayao, nagpalagyo ang suspek matapos ang krimen apang gilayon naman ini nga nagsungka sa CIDG.
Sa pagsungka sang suspek, nadiskubrihan nga ini ang may pending warrant of arrest sa kaso nga pagpanghimulos nga ginkomiter sa Concepcion, Iloilo.
Sa karun nagapabilin nga yara sa paghinakop sang CIDG ang suspek para sa nagakaigo nga disposisyon.