NEGROS OCCIDENTAL- Nagpasar ang Sangguniang Panlungsod sang Himamaylan sang ordinansa nga nagapasanyog sang transparency sa paggamit sang Special Education Fund (SEF).
Paathag ni Vice-Mayor Justin Dominic Gatuslao nga ang ordinansa nga iya gin-author ang magaplastar sang mga mekanismo agud mangin mas accessible, inclusive kag accountable ang paggamit sang SEF.
Ginamandu sang ordinansa nga ang Local School Board nga maga-publish sang mga dokumento may angot sa SEF kaangay sang collection kag disbursements kag ipaskil ini sa tanan nga bulletin boards sa mga eskwelahan.
Kinahanglan man nga mahatagan sang kopya sang amo nga mga dokumento ang Sangguniang Panlungsod, Association of Barangay Captains, kag ang Sangguniang Kabataan.
Ginapangibabaw sang ordinansa ang kinamatarong sang tagsa ka Himamaylanon nga mag-request nga mahatagan sang kopya sang amo nga mga dokumento.
Ang Special Education Fund ang ginakuha sa real property taxes nga ginakolekta sang local government unit kag ginaalokar kag ginagamit sang Local School Board kun sa diin co-chairman ang alkalde kag ang Department of Education Superintendent.
Suno kay Vice Justin, ini nga ordinansa ang nagapalig-on sang public trust, nagapabakod sang mga komunidad kag nagasiguro nga ang pundo nga para sa mga estudyante ang nagalab-ot sa ila kag makabulig agud mapatin-ad ang ila pangabuhi.
[PHOTOS: VM Justin Gatuslao/Himamaylan LGU/Facebook]