Padayun nga ginapangita sang iya pamilya ang 23-anyos nga babaye matapos ginreport missing kag wala na makapauli sang halos lima na ka adlaw humalin Agosto 15.
Ginkilala ang missing nga babaye nga si Rhilin Armi, 23-anyos kag residente sang Purok Elmo, Totong 4, Brgy. Felisa, Bacolod City kag nagatrabaho sa isa ka department store sa Bacolod.
Ginpahayag sang iloy ni Rhilin nga si Ramona Armi, Agosto 15 sang hapon sang yara ini sa ila balay sa Barangay Banago samtang si Rhilin ang yara sa ila balay sa Brgy Felisa kaupod ang iya 25-anyos nga magulang nga nagapanglaba kag 13-anyos nga nagakatulog.
Suno sa iloy, nag-message ini sa iya bata nga magpadulong sa Banago agud dal-on ang pila ka mga produkto sang Personal Collection sa iya kag kuhaon ang sud-an, pahayag ni Ramona, nagreply lang sang ‘like emoticon’ si Rhilin.
Sa pagpauli sini sa ila balay sa Felisa, wala na sini makita si Rhilin kag wala man ini nagpahibalo sa iya duha ka utod. Gilayon naman nga nagtawag si Ramona sa iya pamilya sa Banago agud magpamangkot kun nagpadulong didto si Rhilin apang ini wala nakapakita.
Sa pagpamangkot sini sa mga kaingod, nakit-an nga nagwa si Rhilin bitbit ang mga PC products apang wala na matalupangdan kun diin nagpadulong.
Nagpahibalo na sa kapulisan ang iloy ni Rhilin agud magpangayo sang bulig, matapos ang halos lima ka adlaw, nagpauli subong nga adlaw ang amay ni Rhilin gikan sa Manila bangud sang kabalaka kag agud magbulig sa pagpangita.
Pahayag sang amay kag iloy, maayo ang relasyon sang mga ini kay Rhilin kag halos indi na makakaon bangud sang kabalaka.
Sa may ihibalo kag may impormasyon, sarang lang makapakig-angut sa 0907 282 8375 ukon 0909 952 4202 ukon magmensahe sa facebook page sang DYHB RMN BACOLOD 747.