Nasunog ang tatlo ka mga balay kag tatlo ka mga motorsiklo bangud sa naglupok nga breaker kahapon sang aga, Agosto 18 sa Sitio Pitgong, Barangay Oringao, ciudad sang Kabankalan. Sa tatlo ka mga balay, duha ang totally damage nga kun diin ginapang-iyahan ini ni Remmy Camancho kag ni Jonny Camancho kag partially damage naman ang balay ni Mercy Ricaplaza. Samtang, wala man nakaluwas sa sunog ang tatlo ka mga motor nga ginapanagiyahan ni Jonny, Renelda Tomas, kag Arcenio Javier. Suno kay FO 1 Jezreel Fertalia, Fire Arson Investigator sang Bureau of Fire – Kabankalan City, naglupok ang breaker sa balay ni Remmy bangud nga overload na ang kuryente. Dugang pa ni Fertalia, naka-attach man sa balay ni Remmy ang koneksyon sang kuryente sang iya bata nga si Jonny. Nahibaluan nga himo sa light materials ang tatlo ka mga balay. Yara naman sa ₱20,000 ang estimated damge sang sunog kag posible nga mataas pa ini suno kay Fertalia. Sa karon padayon pa ang imbestigasyon sang BFP Kabankalan City sa amo nga insidente.
