PROVINCIAL CAPITOL – May posiblidad nga ma-blocklist sa mga public bidding sang Department of Public Works and Highways (DPWH) ang tatlo ka mga contractors nga nagapahayag nga may flood control projects sila sa San Carlos City apang ginaalegar “non-existent” ukon wala nagaeksister.
Ini ang ginpahayag ni Engr. Juan Alfonso Jorbina, ang district engineer sang 5th District Engineering Office nga may sakop sa San Carlos City, sa exclusive interview sang DYHB RMN Bacolod.
Suno kay Engr. Jorbina, ginpakadto sini si Assistant District Engineer Pedrito Bautista sa DPWH Central Office agud mangusisa sa update sa reklamo ni San Carlos City Mayor Rene Gustilo nga ginpeke ang iya nga pirma kag wala nagaeksister ang amo nga mga proyekto.
Kun mapamatud-an, suno kay Engr. Jorbina, makabig ini nga falsification of public documents.
Paathag ni Engr. Jorbina, kun ang mga contractor ang makabig nga blocklisted, indi na ini pagtugutan nga makapasakop sa mga bidding sa mga proyekto nga ginapatuman sang DPWH.
Nahibaluan nga ginlista sang Luzon-based contractors nga APO General Construction, Jaben Contracting Engineering Services kag EKC Construction nga may ginpatuman sila nga proyekto sa Palampas, Andoon kag Higalaman Rivers sa San Carlos City apang ginpanginwala ini sang San Carlos City Government kag ginpanindugan ni Mayor Gustilo nga ginpeke ang iya nga pirma.
Samtang, ginpahayag niEngr. Jorbina nga sa 40 katuig sini sa serbisyo, wala sini mabatian ang amo nga mga contractor.