PROVINCIAL CAPITOL – Ginklaro ni Engr. Juan Alfonso Jorbina, ang district engineer sang 5th District Engineering Office, nga indi isolated ukon wala gin-single out ang San Carlos City sa pagpatigayon sang verification sang flood control projects.
Sa exclusive interview sang DYHB RMN Bacolod, ginpaathag ni Engr. Jorbina nga kabahin sang normal kag regular nga proseso sang DPWH Procurement Bureau nga mag-verify sa mga local government units kun ang mga proyekto nga gina-claim sang mga contractors ang aktwal nga gin-obra.
Ini bangud ang Procurement Bureau ang wala sang data sang mga proyekto nga ginpatuman sang LGUs indi kaangay sang mga kontrata nga nag-agi sa mga district engineering offices nga sarang lang ma-access sang DPWH Central Office sa internet.
Nahibaluan nga ginlista sang Luzon-based contractors nga APO General Construction, Jaben Contracting Engineering Services kag EKC Construction nga may ginpatuman sila nga proyekto sa Palampas, Andoon kag Higalaman Rivers sa San Carlos City bilang kabahin sang ila mga “experiences” ukon mga proyekto nga ila na naobra agud magdugang sa ila nga credential sa pagpa-update sang ila nga lisensiya sa Philippine Constractors Accreditation Board (PCAB).
Apang ginpanginwala ini sang San Carlos City Government kag ginpanindugan ni Mayor Gustilo nga ginpeke ang iya nga pirma.
Aminado si Engr. Jorbina nga kaangay ni Mayor Gustilo, mangin siya ang nakibot man bangud sa tanan nga mga local government units sa bilog nga Pilipinas, ang San Carlos City ang napili sang nasambit nga mga contractors.
Sa personal nga opinion sang district engineer, mahimo nga nagpinsar ang tatlo ka mga construction firms nga indi na pag-i-check sang DPWH Central Office ang mga proyekto sa San Carlos City bangud malayo na ini sa ila.