BACOLOD CITY- Nagresulta sang pagbaha ang nagsupon nga sagbot sa tamburong sa Generoso Villanueva Sr. National High School sa Barangay Granada sa ciudad sang Bacolod, kahapon nga adlaw, Agosto 20.
Ginpahayag ni Punong Barangay Armando Vito, kapin 400 ka mga estudyante ang stranded kahapon bangod sa amo nga pagbaha kag pila sa ila ang nag-ubog na lamang agod makapauli.
Sa pagpangusisa sang barangay, bangod sa tuman kadako nga bulyada sang ulan, nagsupon ang basura sa tamburong rason wala ini gilayon nag-ilig kag nagresulta sang pagbaha.
Suno kay Vito, nauna nga kahigayunan natabo ang pagbaha sa lugar.
Nagpasiguro naman ang principal sang buluthuan sa barangay nga kada semana na nga pagatinunlaan ang tamburong agod indi na ini liwat matabo.