Nagpasalig si Central Philippine State University (CPSU) President Dr. Aladino Moraca nga indi maapektuhan ang pag-eskwela sang mga estudyante apisar nga wala pa na hitso ang problema sini sa duta nga ginapanag-iyahan sang pamilya Nazareno.
Sa interview sang DYHB kay Moraca, ginpahayag sini nga sa karon, ila gid ginapasiguro nga indi mabudlayan ang mga estudyante kag indi maistorbo ang ila nga pagtuon sini nga 2nd semester.
Dugang pa sini nga iya na gin-ayo ang school administrator nga mag-coordinate sa Local Government Unit sang Moises Padilla naangut sa ano man nga desisyon nga makapamaayo sa mga estudyante.
Sa madumduman, una na ginpabutyag ni Negros Occidental Governor Eugenio Jose “Bong” Lacson nga bukas ini sa ideya nga magabakal ang Provincial Government sang lain nga propedad agud sayluhan sang CPSU.
Ini kasunod sang nangin kapaslawan sang probinsya nga mabakal ang duha ka ektarya nga duta sang pamilya Nazareno nga una na ginpaidalom sa usufruct agreement bangud sang problema sini sa dokumento.
Suno kay Lacson may kwarta kun tani ang kapitolyo para diri apang indi man nila mapilit kun mismo ang tag-iya ka duta ang indi luyag magbaligya sini.
Sa pihak nga bahin, ginpahayag ni Moraca nga magaupod lang ang CPSU sa kun ano man ang mangin inisyatibo sang LGU.
Ginklaro man sini nga sa subong, wala pa man sila ginapwersa sang pamilya nga maghalin sa lugar.
Aminado man si Moraca nga kun sila lang ang maga-decide, indi nila ini pagkayanon amo kun ngaa nagpangayo man sila sang bulig sa gobyerno agud nga mahatagan na sang solusyon ang ini nga problema.