Nagapanindugan si Bacolod City Water District (BACIWA) Board of Director President Atty. Sonya Verdeflor nga nag-agi sa due process ang ila desisyon nga kakson bilang General Manager si Mona Dia Jardin.
Sa interview sang DYHB kay Verdeflor, ginpahayag sini nga madamo sang ginlapas si Jardin kag isa na dira amo ang problema sini sa transparency kag ang kakulangon sang ila pag-update sa BACIWA board natuhoy sa Joint Venture Agreement (JVA).
Suno kay Verdeflor, ang Board ang nag-appoint kay Jardin, buot silingon nga obligasyon niya ang mag-report sa BOD kag ilabi sa tanan siya ang accountable sa pagsabat sa pagpangusisa sang board.
Tubtob sa gina-enjoy sini ang trust and confidence sang board, magapabilin ini sa pwesto.
Dugang pa ni Verdeflor nga dapat mangin transparent sa isa kag isa ang board kag ang GM, kun may problema, dapat gina-istoryahan kag ginapabalo ang board bilang policy making body. Kun wala ini ginasunod, buot lang sini silingon nga wala na sang “trust and confidence.”
Sa pihak nga bahin, ginpahayag ni Verdeflor nga may mga purchases man nga wala sang “due deligence” ilabi na ang pagbakal sang BACIWA Eco Park sa Barangay Alangilan sa diin P20 million lang ang gin-suggest sang BOD apang P34 million nga balor sang property ang ginpili sang BACIWA.
Ginphayag ni Verdeflor nga kun ginapanindugan ni Jardin nga wala nag-agi sa due process ang pagkakas sa iya, sabat sini nga una na sila nagdagdag sang board resolution kag ginpasabat ini sa sulod sang 5 working days. May mga documenrts man ini nga ginpasa sa board naangut sa ecopark apang wala sang certification.
Suno pa kay Atty. Verdeflor, fully paid na ang P34 million nga property apisar nga wala sang clearance.
Sa pihak nga bahin, may nga financial report gid man ang mga ini apang wala sang supporting documents. Suno sa abogado, ang Commission on Audit (COA) ang indi maka-verify sang ini nga mga figures bangud nga wala man sang support.
Paathag pa ni Verdeflor, iya ini ruling sang Supreme Court kag indi iya.