Ginpasidunggan sang Sangguniang Kabataan Federation sang Negros Occidental ang 112 ka mga SK Council sa probinsya matapos nakapasar ang mga ini sa Sangguniang Kabataan Functionality Audit 2024.
Ginpatigayon ang SK Federation Awards sa Negros Residences sa Bacolod City subong nga gab-i, Agosto 25 nga gintambungan sang mga SK Chairman gikan sa nagkalain-lain nga Barangay sa 22 ka mga Local Government Units sang Negros Occidental.
Ang nasambit nga pagkilala ang ginhatag sa mga SK leaders nga nagpakita sang ila ‘excellence’, ‘accountability’ kag dedikasyon may angut sa pagtuman sang ila mga papel bilang mga kampeon sang mga pamatan-on.
Base sa gin-anunsyar sang SK Federation sang probinsya may pinakamadamo nga nakapasar kag nakabaton sang award amo ang ciudad sang La Carlota nga naglabot sa 14.
Bangud sang pila pila ka mga palamangkutanon, nagpagwa sang statement si Negros Occidental SK Federation President Mayvelyn Madrid may angut sa nangin resulta sang Assesment.
Pahayag sini, nga ang audit assesment ang nakabase sang 2023 apang pila sa mga ‘current’ SK officials ang nag-assumed lamang sang ila office sadtong Oktubre 30, 2023 kag nagakasayuran nga kalabanan sang mga ini ang indi pa fully aware sang mga accomplishment sang nakaligad nga SK officials.
Apang required ang mga ini nga magsumiter sang kinahanglan nga mga dokumento kag reports sa DILG bilang kabahin sang SKFA process.