NEGROS ORIENTAL- Isa ka riding in tandem ang ginalantaw nga suspetsado sa pagpangluthang sa contractor sa Sitio Omanod, Brgy. San Francisco, Santa Catalina, Negros Oriental, Miyerkules sang aga, Agosto 27.
Ang biktima ang ginkilala kay Engr. Angelito Mendoza, magluwas nga ini ang contractor siya man ang nagapanag-iya sang quarry, ini 58-anyos kag residente sang Brgy. Manalongo sa nasambit nga banwa.
Ginpahayag ni PSSG Eldridge Carl Maghanoy, Investigator on Case sang Santa Catalina Municipal Police Station, magapadulong kuntani ang biktima sa quarry site nga nahamtang sa Sitio Omanod, Brgy. San Francisco sakay sang iya motorsiklo.
Apang pag-abot sa lugar sang insidente, ginluthang ang biktima sang makatatlo ka beses sa iya likod rason kun ngaa natumba ini kag ang iya motor.
Sa inisyal nga imbestigasyon, ginsundan ang biktima sang duha ka indibidwal nga wala pa makilala nga nagasakay sa motorsiklo.
Sa karun yara na sa estable nga kondisyon si Mendoza.
Suno kay Maghanoy padayon ang imbestigasyon sang kapulisan kun ano ang motibo sa krimen kag pagtumod sa mga suspetsado.