Gina-alegar ginhimuslan sang iya kaugalingon nga amay ang iya mismo 7-anyos nga bata sa isa ka Barangay sa ciudad sang Himamaylan.
Sa exclusive interview sang DYHB RMN Bacolod sa 26-anyos nga iloy sang bata, ginpahayag sini nga nagatrabaho siya bilang OFW sa Dubai sang halos tatlo na katuig kag ang duha nila ka mga kabataan ang nabilin sa paghinakop sang ila 34-anyos nga amay.
Suno sa Iloy, may wala na pag-inchindihanay sa tunga sa ila sang iya bana apang may komunikasyon man ini sa iya mga bata kag naga-video call apang natalupangdan sini nga pirme naga-tupad ang amay sa iya bata sa tagsa ka pag-tawag kag tulala ang bata.
Sa pagpauli sang Iloy sa Negros, wala ini nagpahibalo sa iya bana kag ini ang nagderecho sa balay sang iya ginikanan sa banwa sang Isabela tinalikdan nga Agosto kag ginlihog ang iya ginikanan nga kuhaon ang iya duha ka bata sa Himamaylan kag ang mga ini ang gindul-ong man sang ila amay nga wala nakahibalo nga nagpauli na ang iya asawa.
Sa panaysayon sang iloy, nagareklamo ang iya bata nga nagasakit ang kinatawo sini kag sa pag-tsyekyar kag pamangkot, didto na ginpahayag sang bata nga ginatandog ini sang iya amay kag nagapabutyag nga indi na magpuli sa ila balay.
Ginpadangat man sang Iloy sa Municipal Health Office ang bata kag positibo nga ini ang ginhimuslan.
Nagpadulong man ang Iloy sa talatapan ni 5th District Congressman agud magpangayo sang bulig may angut sa mga antibiotics kag nagakaigo nga pagtatap sa bata.
Sa karon, nagapakig-angut na ang Iloy sa kapulisan kag desidido nga magpasaka sang kaso batok sa iya bana agud magahatan sang hustisya ang ginhimo sini sa ila bata.