BACOLOD CITY- Narekober na sang Bacolod City Police Office ang salakyan nga ginsakyan sang gunman nga nagluthang sa driver sang Cosmopolitan Christian Church sang tinalikdan nga Agosto 24 sa bahin sang Circumferential Road sakop sang Barangay Taculing.
Madumduman ang biktima ang ginkilala nga si Efren Banagloryoso, 59-anyos, residente sang Brgy. Granada kun sa diin ini ang ginpaarakan luthang sang suspek nga nagasakay sa itom nga SUV sa gwa sang ginatrabahuan nga simbahan
Suno kay BCPO Director Police Colonel Joeresty Coronica, narekober ang salakyan sang Setyembre 1 sa banwa sang Don Salvador Benedicto nga naga-park.
Base sa natipon nga impormasyon sang Special Investigation Task Group, ginpahulam sang tag-iya ang salakyan sa isa ka naga-engage sa buy and sell bangod natalana na kuntani ini igabaligya.
Apang suno naman sa naghulam, iya ini ginpahulam sa iya parente rason nga ini ang nagpanginwala nga siya ang may kahilabtanan sa krimen.
Sa amo nga progreso sang imbestigasyon, may yara na sang person of interest ang kapulisan angot sa may kahimuon sa pagluthang kay Banagloryoso.